"الله يمتعك بالعافية يا أبا موسى
كتاب غاية في العذوبة
يصلح لمن شدا شيئا في علوم البلاغة، وليست الغاية فيه البلاغة فحسب، ولكن معاني العزة والإباء والكرامة التي يريد الشيخ أبو موسى زرعها فيك وهو يدرّسك البلاغة، وهم الأمة الذي يحمله على أكتافه وينضح من بين أسطر في علم المعاني في أصلها.

وهذه في ظني أمانة العلم، وتربية العقل، فإن أجدادنا لم يضعوا هذه العلوم إلا للغاية العظمى من ورائها، فهم خطاب الله وتمكنه في نفس المؤمن وتطبيقه في واقعه.
فلا يخدعنا الظاهر عن الباطن.

لله من رجل حصيف مبدع، متعنا الله به."

"نفتكر 2023 الجميلة عشان 2024 مش قد كدا :)

الحمد لله على التمام 💚
رغي شخصي تمامًا لكن حابة أشاركه هنا :)

أنا بقرأ بشكل منتظم من ٨ سنين تقريبًا، لكن السنة دي مميزة لأنها أول سنة أتواجد فيها على جودريدز وأكتب مراجعات وأشارك اقتباسات والذي منه..
حابة أتذكر اليوم اللي كنت لسه مخلصة امتحان ما في الكلية واشتريت كتب جديدة وأنا مروحة كعادتي بعد كل امتحان، كنت وقتها بعاني من ريدنج بلوك فظيعة وقلت أنا هعمل آكونت على جودريدز أشوف الدنيا بتقول ايه، لعل وعسى الريدنج بلوك دي تتفك، وقد كان :) فضلت سنتين تقريبًا بضيف الكتب بس ومبشاركش أي حاجة ومش بتواصل مع حد، بس السنة دي قررت أكتب..

أنا بكتب ليه؟ بكتب لنفسي في المقام الأول، عشان أفتكر.. لأني لقيت نفسي بنسى الكتب اللي قرأتها من ٣ أو ٤ سنين مثلًا، فقررت أكتب للتوثيق، وبكتب عشان أفكاري بتوضح لما تطلع من مخي وتبقى حروف قدامي، وعشان أشوف ازاي تفكيري بيتغير خلال السنين..

وبكتب عشان الونس، "الكوميونتي" هنا لطيف حقيقي وسعيدة بكل الناس الحلوة اللي عرفتها.. حبيتهم جدًا واتعلمت منهم كتير وياما غشيت منهم كتب ومشاريع قراءة وأفكار :) بتمنى كل خير للجميع ويا رب دايمًا كلنا بنقرأ كتب حلوة ومبسوطين :)

مجملًا سنة 2023 القرائية كانت حلوة الحمد لله.. جودريدز ساعدني أقرأ كتب متنوعة يمكن مكنتش هسمع عنها أبدًا، ومبسوطة عشان السنة دي قدرت آخد خطوات في حاجات كنت متهيبة أعملها زي زيادة الكتب غير الروائية مثلًا، والقراءة باللغة الإنجليزية، وإني أقرأ لكتّاب كبار كنت بقول لنفسي أنا مش هفهم حاجة لو قرأت لفلان، لكن الحمد لله كسرت الحاجز دا.. وكمان دخلت في تجارب قراءة مشتركة مع صديقاتي العزيزات وكانت تجارب لطيفة جدًا.. واتشرفت إن فيه مؤلفين بعتوا لي رواياتهم عشان أقرأها وأكتب رأيي، حقيقي دي حاجة أسعدتني وشاكرة ليهم جدًا وبتمنى لهم كل التوفيق :)

في دماغي مليون خطة للسنة الجديدة إن شاء الله، لسه في ناس كتير أوي عايزة أقرألهم، وقائمة want to read تتمدد باستمرار.. الواحد حاسس إنه هيموت من غير ما يقرأ 1% من اللي عايز يقرأه.. قد يبدو هذا الكلام أڤورة لكن بالنسبة لي القراءة هي إحدى متع الدنيا القليلة، أنا فعليًا مابيبسطنيش غير إني أقرأ، وآخد بالي من نباتاتي، وألعب مع قطط الشارع وأصورهم :)

لكن ساعات كتير، كتير جدًا، القراءة بتضغط عليا.. بحس إني overwhelmed، وإني عايزة أخلص الكتاب اللي في ايدي عشان أقرأ كتاب تاني، لأن فيه كتب كتير أوي لسه عايزة أقرأها.. أعتقد إن دا نتيجة دراسة الطب، لأن للطب قدرة عجيبة في تحويل كل الحاجات إلى "تاسكات"، والشعور بالضغط المستمر، وإنك دايمًا متأخر ودايمًا متراكم عليك حاجات قاااد كدا، دايمًا عايش في تنافسية سامة وتوتر وضغط وإجهاد وتأنيب ضمير على كل شيء وأي شيء..
وهأنذا كعادة معظم طلاب الطب - والمهندسين - أقحمت سيرة الطب في كلامي :) لكنه شر لا بد منه للأسف.. الطب بيستنزف البني آدم ولازم بيغير شخصيته ودماغه.. 
أرجو إن القراءة متتحولش لسبب من أسباب الضغط النفسي، أرجو إنها تفضل دايمًا بالنسبة لي ملاذ آمن من الدنيا ومتعة حقيقية وونس واستفادة، ومعنى أعمق من الكلام :)

طبعًا منقدرش ننسى قضيتنا الأولى، أخواتنا وحبايبنا في فلسطين.. كلنا ملازمنا وجع القلب الدايم والإحساس بالقهر والعجز والواحد مفيش في ايده حاجة غير الدعاء، وإنه يقرأ عن القضية ويتعلم ويحاول يشارك اللي اتعلمه مع اللي حواليه، لأن طبعًا الموضوع مش "تريند"، والدعم والاهتمام اللي مش متأسس على معرفة حقيقية مصيره يتنسى ويتلاشى، لذا نويت إن شاء الله أستمر في القراءة عن فلسطين، كتب وروايات وقصص وتاريخ وعلوم اجتماعية وأدب وفن وسير ذاتية..
يا رب النصر والفرج من عندك يا رب، يا رب كن معاهم وثبتهم وصبرهم وأمنهم من خوف وجوع وعطش، يا رب اشف مرضاهم وارحم شهدائهم واربط على قلوبهم يا رب، وسامحنا على عجزنا وتقصيرنا..

شكرًا للي وصل لحد هنا :)"