ŷ������

عجبني الكتاب جدا .. ترتيب القصص بالنسبة لي:

( اكثر 3 قصص تبعث الأمل)
- مذكرات لا احد
- الملحمة
- خريف الاحلام

( اكثر 3 قصص تبعث الحزن ولكن بها معنى عميق)
- لا اريدك
- الخطبة
- ينابيع الحجر

ديه خواطري اثناء وبعد القراءة :)

1. نهايات القصص: يمكن نهايات بعض القصص كان بها حدة وكان نفسي تكمل ببعث الأمل اكتر لتتماشى مع عنوان الكتاب وفكرة مهما كان فيه ظلام يوجد بداخلنا نور يحول اليأس لأمل وتفاؤل. لكن لعلى رؤية الكاتب ان القصص يتماشى مع الواقع ان الانسان يميل لليأس ويترك للقارئ ان يستشعر ماذا كان على بطل القصة ان يفعل.

2. شيوع الفن: كان مسيطر على معظم القصص الفن (رسم، عود، اوبرا، نحت، مسرح، ...الخ) و اول ما لقيت قصة فيها مهندس طلع كان بيحب الرسم وعلشان اهله اتجه للهندسة ونهاية القصة ان ابداعه دفن بسبب عدم تقبل عالم الارقام الفن والابداع. حسيت شوية بتحيز انا مش ضده لكن لو ميول الواحد علمية حيحس بده.

3. الحب والخيانة: كان سائد فكرة الفتاة المخدوعة وشعور بعدم الامان للرجل، كما هو في"ينابيع الحجر - 1+1=1 - حبيبة القمر - البحيرة السوداء - الخطبة" و فكرة الابن اللي ترك امه "خريف الأحلام - لا اريدك" .. احساس ان الرجل مصدر للأحزان بالنسبة للمرأة، ممكن يبقى ده غير مقصود لكن تكراره حسسني بكده.

4. القصص الرمزية: كان متداخل لون جديد في القصص الا وهو ان بطل القصة يكون جماد او شئ معنوي، كما هو في "الجميلتان - البحيرة السوداء - حبيبة القمر - الخطبة - سباق الابجدية". شعرت ان 3 قصص كانوا خارج اطار 7 الوان مقدرتش اربط فكرة الكتاب بيهم او مغزاهم يمكن فكرة الغيرة والخيانة والنسيان مجسدة في الجماد. اما القصتين التانين كانوا في نظري اقوى لطرحهم فكرة الغرق في الذكريات وتدهور اللغة هدف القصة كان واضح ووصل بشكل مبهر.

5. مذكرات لا أحد: شايفة ان الكاتب ابدع في وصف حالة الانسان امام المنافسة ومقاييس النجاح ونظرته لنفسه .. ببساطة طرح في فكرة ان السجود لربنا والتفكر في خلقه هو خروج من الاحباط وخيبة الامل للرجاء والتفاؤل. يمكن دي اكتر قصة من اولها لآخرها قدرت اربطها بعنوان الكتاب ولمستني جدا.. صراحة كنت طوال القراءة مفتقدة لفكرة الاستعانة بالله حقيقي جت في وقتها :)

سارة انتي وصلتي بالكتاب ده لمكان اعتقد انه بيميزك عن اي حد
.. لقيت طريقة كتابتك وتعبيرك مؤثرين جدا ومميزين جدا .. حساكي قريتي كتير اوي الفترة اللي فاتت واتأثرتي باكتر من كاتب وطلعتي خلاصة تأثرك ده بحاجة ذات طابع خاص. عندي كلام اكتر وتعليقات اكتر لكن كفاية كده علشان الكلام مش حيخلص. اخر حاجة اتمنى العمل القادم يبقى كتاب لقصة متكاملة لو الوحد خلصه يحس انه عمره ما حينساه ويترك اثر عميق لان في رأي مهما كانت القصص مؤثرة الا انها كتير ومتنوعة فالواحد بيتوه احيانا.

وفقك الله واسأل الله ان يزيدك علما ويفتح لك :)