ŷ������

بعد ما خلصت قراءة الكتاب اللي استمتعت بيه للغاية واسترجعت معاه ذكريات الرصد الجميلة أقدر أقول إن ده بالضبط اللي هاوي فلك محتاجه .. زي الاسم ما بيقول هو "دليل عملي" و"من الصفر" تماماً ..

بيبدأ معاك أول 3 فصول بأساسيات
في أول فصل بمفاهيم ومصطلحات خفيفة عن احداثيات السما عشان تعرف توصف بيها بعدين في الكتاب مكان أي جرم سماوي، وبشكل عملي هتعرف ازاي السما بتتحرك، والنجوم بتتغير اماكنها في اليوم، وازاي بتتغير من فصل للتاني وازاي تقيس المسافات في السما بأمثلة سهلة للتخيل والكتاب بيشجعك تطلع تتفرج بنفسك عشان توصل لمرحلة انك متآلف مع السما بمجرد نظرة تعرف معلومات كتير.

الفصل التاني للنجوم عبارة عن ايه؟ واتولدت ازاي ونهايتها ايه؟ انواعها؟

الفصل الثالث عن الاجرام السماوية يعني ايه سديم ومجرة ونجم ثنائي وتجمع نجمي الخ.

الفصل الرابع وده في رأيي أجمل فصل في الكتاب هيفتح قدامك سماء نصف الكرة الشمالي ويعرفك على خريطتها بحيث تكون عارف ثوابت في السما توصف بالنسبة لها أماكن كل اللي جاي بعد كده في الرصد .. الفصل مكتوب بشكل رائع مع معلومات خفيفة عن النجوم طول ما انت بتقرأ بجانب إنك بتتعلم الخريطة .. الفصل ده محتاج يتاخد واحدة بواحدة على مدار السنة عشان تعرف كوكبات كل فصل.

الفصل الخامس عن المجموعة الشمسية وطبعا مش معلومات نظرية
بس انت بتتعلم ازاي ترصد الكواكب في السما.

الفصل السادس عن القمر وأطواره وحركته في السما والمعالم اللي على سطحه.

الفصل السابع للتليسكوبات .. انواعها وتركيبها وهتشوف بيها ايه وازاي تختار واحد يناسبك.

الفصل الثامن عن الشهب ومواعيدها وبياخدك كمان لمستوى تاني ازاي راصد فلكي هاوي يقدر يشارك في البحث العلمي.

الفصل التاسع هياخدك لمقاييس أكبر هتعرف الوحدات اللي بيتقاس بيها المسافة بين النجوم وبين المجرات وهتعرف تصور العلم حاليا عن الكون المنظور.

الفصل العاشر عن التنجيم وليه هو مش علم.

وفي الكتاب كله هتلاقي الاسلوب شيق وممتع المعلومات محكية زي ما يكون صديق عزيز بيعلمك ويتسامر معاك مش معلومات صماء جامدة.. بعيد كل البعد عن الملل.

المميز جدا كمان ان الكتاب عبارة عن نصائح "عملية" من راصد خبير .. هتجنبك ساعات من الرصد الخائب هذكر منها إنك تنتظر الجرم أما يرتفع عن الأفق عشان تشوفه خصوصا مع الاجرام الخافتة زي مجرة اندروميدا .. أو انك مترصدش البدر لو عايز تشوف معالم القمر .. الكتاب مليان نصائح عملية مهمة جدا جدا في كل موضع ممكن.

فيه عدد كبير من الصور التوضيحية.

فيه حكايات النجوم المسلية بتاعت الإغريق موزعة في أماكن مختلفة في الكتاب بتديك فكرة عن القدماء كانو بيشوفو السماء ازاي وتفسر لك ليه النجوم اتسمت بالاسماء دي.

وفيه اقتباسات جميلة منتقاه في أول الفصول.

ومن الحاجات الرائعة ترشيحات للكتب والأطالس والأبليكيشنز اللي هتفيدك في الرصد.

فيه ملحقات وجداول قيمة وصور ملونة للأجرام
وفيه أطلس للسماء في نهاية الكتاب.

طبعا كتاب قيم استمتعت بيه جدا وأظنه هيفيد أي هاوي فلك وهيساعده في الرصد وهيكون رفيق ممتاز على مدار السنة.