ŷ������

كنت من فترة طويلة قررت إني خلاص كدة خاصمت روايات أحمد مراد حقيقي ... تحديدا من بعد لما قريت الفيل الأزرق ... كان عندي إعتراضات كتيرة على اللغة بين الطبيبين أبطال الرواية وعلى سلوك البطل وعلى إدمانه وهلوساته وقائمة طويلة من الاعتراضات

حقيقي حاولت كل مرة ومع صدور كل رواية له اسأل نفسي هتقري بجد ولا هتبقي مجرد عدد في حزب/تريند الـ
haters
اللي بيقروا علشان يقولوا يعععع الرواية وحشة؟ وكنت بلاقي إني مكتفية بمتابعة ردود الأفعال فقط

لغاية لما نزل إعلان الرواية دي وقريت النبذة ... كنت عايزاها فورا واتأخرت في شرائها وكالعادة متابعتش أي مراجعات علشان حكمي ما يتأثرش

أحمد مراد كان لابسه عفريت تقريبا وهو بيكتب 😁😁 تقمص الزمان والمكان ولغة الزمان والمكان بفظاعة

ومعلش يعني يا جماعة سوري لو هجرح شعوركم بس أنا عاصرت معمرين تقريبا كانت الأمثال اللي بيقولوها بأريحية تشبه كتير الأمثال المذكورة في الرواية وكانت كفيلة لما تتقال في مكان أنا فيه تخلي وشي يقلب أحمر طماطم من صدمة وقعها على وداني 😅

سمعت أمثال مشابهة من قرايب كانوا قريبين جدا مني اتوفوا في سن قريب من المائة وكنت وقت وفاتهم في الجامعة فأكيد كنت واعية للي بيقولوه من بدري ومقدرش أردده 🙃🙃🙈

البطل هنا مش شخص عادي ولا طبيعي فبالتالي الكلام على لسانه مش هيكون عادي ولا طبيعي وضحكني في بعض مواقف

الحبكة ممتازة جدا وهتفضل متأرجح بين يا ترى احنا في رواية بوليسية ولا رواية فيها جن وعفاريت ... طيب أصدق ولا ماصدقش

خلينا نقول كمان المزج بين الخيالي والتاريخي كان أكتر من ممتاز ومتعوب عليه حقيقي

النهاية غير متوقعة بالمرة وهتسيبك برضو تقول هو كان إيه دة؟؟!! 😅😁😁

كان غريب إن نصف الرواية في النبذة وإلا مكنتش هتعرف مين دة ولا إيه اللي بتقراه دة؟! فكرة جديدة حقيقي إنه يستخدم النبذة كجزء من الرواية

بس يعني هو الأكيد بالنسبالي إن ماينفعش يبقى لها جزء تاني حتى لو جه على لسان بطل الرواية تلميح بكدة لأن نهاية الضحية السابعة في الرواية كانت حاجة وفي حقيقة الأمر في الواقع التاريخي كانت حاجة مختلفة

ليه ٤ نجمات مش ٥؟ يمكن علشان حسيتها كئيبة شوية وفيها تفاصيل كتير ممكن كانت تختصر ... بس أكيد أكيد بداية صُلح مع أعمال الكاتب