ŷ������

واقع في غرام قراءة السير الذاتية، حكايات السياسيين و رجال الاعمال والمؤثرين عموما.

خبرات وحيوات وتجارب بتتعلم منها من غير ما تعيشها.

في امريكا واوروبا إي حد عنده تجربة نجاح بيوثقها في فيلم أو كتاب عشان الناس تستفيد، فبتالي طول الوقت تقدر تلاقي محيط عام من الإلهام والنجاح.

دى تاني سيرة تصدرها الدار المصرية اللبنانية طباعة - نشـر - توزيع للرجال اعمال مصريين أولهم كان سيرة غبور.

Azza Fahmy Jewellery بتحكي قصة حياتها بالعامية من أول ما تولدت.

بنشوفها بتتكلم عن ابوها إلي كان مدير فرع للشركة الانجليزية للقطن وإلي كان عايش هوه واولاده حياة شديدة الرفاهية.

وفي القسم ده بنشوف كتير عن حياة الانجليز والمتعلمين المصريين إلي كانوا شغالين معاهم وعن المصريين عموما.

بنشوف بعد كده ازاي حياتهم تدهورت لما ابوها مات بدري وازاي امهم قدرت تعيشهم كويس.

بعدها بتخلص عزة كلية وتشتغل في الحكومة وبعدين بتنزل الصاغة تتعلم من اسطوات الصاغة زيها زي اي فني او صبي رغم انها جامعية.

كل ده بتحكيه بالتفاصيل، ادق التفاصيل الحقيقة.

قسم تاني بتتكلم عن انتقالها من فني يقدر يصيغ اى حلي ينطلب منه، لشخص قادر علي تصميم وابتكار الحلي ومن مصمم محلي لمصمم عالمي.

عملت ده بإنها سافرت كل مكان داخل مصر مهتم بالحلي زي سيناء والواحات والصعيد والنوبة وكل مكان خارج مصر زي اليابان والهند واوروبا كلها وافريقيا وكل الدول العربية ودول كتير جدا كانت بتزورها عشان تتعرف علي تقاليد صياغة الحلي.

بقت مصمم عالمي كونها عندها مكتبة مكونة من ٤٠٠٠ كتاب عن الحلي من كل مكان في العالم وفيه تاريخ للقطع والعصور.

بقت مصمم عالمي لما اقتنت الالاف القطع والاحجار من كل مكان قامت بزيارته.

بعد كده بتتكلم عن دور العلاقات في حياتها وازاي لفت العالم تحضر معارض ومتاحف وتعمل معارض لشغلها وعلاقاتها بفنانين وسفراء ووزراء وشخصيات عامة.

ازاي وهي في سن كبير وعندها بنتين تسافر لندن عشان تتعلم صياغة الحلي بطريقة اكاديمية عشان لو صنايعي قلها القطعة دي مينفعش تتعمل تقعد مكانه وتوريه ازاي ممكن تعملها.

بتحكي عن بناتها وازاي علمتهم في اوروبا علوم فنية عن صياغة الحلي منهم امينه الى اتعلمت في اكبر مدارس لصياغة الحلي في ايطاليا وانجلترا وهي بنت ١٧ سنة.

بتحكي كل تفاصيل حياتها وازاي بدأت بورشة مكونة من اوضه واحده لحد ما وصلت انها عندها مصنع فيه ٢٥٠ موظف وعندها فروع ف اماكن كتير ف الوطن العربي وعندها شراكات مع مدارس ومعارض عالمية وشاركت في تحكيم مسابقات دولية وعندها مدرسة فنية لتعليم فن صياغة الحلي للطلبة.

ممكن تقول ان عزة اتولدت في ظروف جيدة وانها عندها قرايب واصدقاء في مناصب عاليه، لكن ده مش هوه بس إلي وفرلها النجاح.

إلي وفرلها النجاح انها بدأت المجال ده من الاول اتعلمت كإي صبي في الصاغة واثقلت علمها بالتعليم الأكاديمي والدراسة الحرة والسفر وراء شغفها والتجربة دي كلها خبرات مش بتتوفر الا بالجهد والكفاح.

#بس��بنقول