ŷ������

الكتاب دا مثال حى عن فكرة تبسيط العلوم ! جمع بين فن الرواية و المقال العلمى و الكتاب و السيرة الذاتية بأسلوب سهل و بسيط بدون ملل غير انه كتاب صغير و شمل حياة دارون بجانب ملخص سريع لتاريخ نظرية التطور .

حاجات كتير اول مرة اعرفها عن دارون و عن نظرية التطور منها التالى :

1 - دارون مكنش شخص عبقرى ولا حاجة هو كان مجرد مجتهد و فضولى و بيمثل مثال للشخص التجريبى و دا بيدل عليه حاجات كتير زى انه مش المؤسس لنظرية التطور لان سبقه ناس كتير اوى اتكلموا عن التطور ! بس كون ان شخص يستغرق اكتر من عشرين سنة فى فكرة تغير من فهمنا للكون و البيولوجيا دا فى حد ذاته عمل يستحق التقدير لذلك انا متفق جزأيا مع المقولة ان لو كان للعلماء ورقة نقدية خاصة بيهم كان هيكون عليها صورة تشارلز دارون .

2 - مهما كان درجة علمك لا بد هيكون فيك بعض من الصفات البشرية الغير مرغوبة و الغير اخلاقية زى الغيرة و الحقد فى شخصية دارون .

3 - عنوان الكتاب تناسب جدا مع محتواه , دارون فضل متردد فترة كبيرة جدا فى نشر ابحاثه عن التطور لحد ما الفريد راسل والاس بعتله ورقة بحثية عن التطور و الانتقاء الطبيعى بس مكنش حط مفهوم للمصطلح دا و دارون نفسه اعترف انه بيمثل ملخص لنظريته و بالتالى سلك سلوك غير اخلاقى بمساعدة أصدقائه فى نشر بحث والاس ملحق بالمخطوطة الخاصة بدارون و اللى وضعها سنة 1844 بدون ما ينشرها عشان يظهر دارون ان هو صاحب الفضل و يظهر والاس فى شكل التابع او المشارك بجزأ بسيط ! لكن لولا هذا الموقف الغير اخلاقى من دارون و اصدقائه لربما كنا بنقول ان واضع نظرية التطور فى العصر الحديث هو الفريد والاس .! و مع ذلك بحث والاس كان غير كافى لانه بيمثل ملخص ! بخلاف اصل انواع اللى كان بالفعل بيمثل ملخص لكتاب دارون الكبير اللى لم يتم نشره الا انه كان شامل ادلة ووضح باسهاب عن بحث والاس .

4 - الكاتب كان حيادى فى عرضه لأخطاء دارون و انتقاداته لكتاب أصل الانواع بجانب مميزاته .

5 - الجزأ الأخير من الكتاب اشتمل ريفيو لنظرية التطور و وضح دور علماء كتير لعبوا دور فى الدفاع عن نظرية التطور .