ŷ������

دا تالت كتاب أقراه لميتشل و أهم كتاب أقراه ليه, الكتاب تأسيسي في مشروع ميتشل كما أظن, وغالبا هحتاج أقرا حكم الخبراء تاني في ضوء قراءتي للكتاب ده, الكتاب كما هو واضح من تعريفه مش مجرد سرد أحداث تاريخية انما تحليل للأحداث ديه بغرض دراسة السلطة الحديثة, أدوات التحليل لميتشل بتعتمد بالأساس
على فوكو ودريدا, بيستخدم فوكو لتحليل أليات ممارسة السلطة الحديثة, ودريدا في توصيف ما يدعي أن السلطة الحديثة عملته من تقسيم العالم لثنائية واقع وتمثيل أو مادي ومعنوي أو عقل وجسد, أخطر فكرة بيطرحها الكتاب هو تبدل آليات ممارسة السلطة من المباشر لغير المباشر من القمع الصريح والعنيف لآليات زي الضبط والمراقبة المستمرة وترسيخ فعل الطاعة من خلال النظام (التأطير) اللي تم تطبيقة من خلال مؤسسات حديثة جابها الاستعمار من محمد على لحد آواخر القرن التسعتاشر زي المدن الجديدة(القرى النموذجية) أو القانون أو الجيش أو المدارس وأظرف مثال قدمه على ده كانت مقارنة بين الأزهر في زمن ما قبل محمد على و المدارس اللي نشأت سواء العسكرية منها في عهد محمد على أو المدنية اللي نشأت بعده, يقول أن نظام التدريس في الأزهر كان لا يختلف عن تعليم الحرف بره أسوا الأزهر, مكنش فيه نظام واضح لممارسة السلطة, ممكن يحصل تبادل الأدوار فيبقى التلميذ أستاذ في لحظة من اللحظات وفي لحظة تانية تتقلب الأدوار, الكتابة نفسها كانت زي أي حرفة تانية, كان الموضوع فوضاوي وقاعة الدرس زحمة ومفيش ادراج للطلاب ولا احصاء ليهم وممكن تحضر أي درس من غير أي اجراءات, والمتابعة كانت بتحصل لما الطالب يروح للشيخ يسأله , وطريقة العقاب كانت مباشرة فلما تحصل مشكلة كان يتم التعنيف الفوري المرتجل الغير معد مسبقًا, على عكس المدارس الحديثة اللي كانت منظمة بشدة , العقاب فيها له طرق معروفة (الخطة أو التمثيل), كان فيه مراقبة وضبط مستمرين, السيطرة على الجسم, على وقت الكلام, وقت الأكل, ديما الموضوع بيمشي حسب الخطة المعدة مسبقًا, هنا السلطة بيتم ممارستها بشكل غير مباشر, من خلال نظام معد مسبقًا, النظام ده هو جوهر السلطة السياسية الحديثة ومصدر يقينها السياسي, يقين بيجي من الخطة المسبقة , الميتافيزيقية, المنفصلة عن الواقع, العقل المتأمل المنفصل عن الجسد (تأثرًا بديكارت).