ŷ������

حاجتين في الرواية دايقوني أوي، أولا الغلاف، حاسس إن مصممة الغلاف دة أخدت الرسمة اللي ابنها رسمها وهو في حضانة وعملتها غلاف عشان تجبر بخاطرو، تاني حاجة المترجم، حوالي خمس أو ست عبارات بيترجمهم ترجمة حرفية ضيعت المعنى تماما، ثقافتو ضعيفة أوي في المصطلحات الإنجليزية الغير رسمية، مثلا الكاتبة كتبت إن واحدة قالت على واحد إنو
asshole
تقصد بالمعنى المتعارف عليه غبي أو رخم أو رزل، قام الكاتب كتبها بالمعنى الحرفي "فتحة شرج"، وطبعا حاجة تموت من الضحك

غير كدة، من أحلى الروايات الهادفة اللي قريتها

في بداية قرأتي للرواية دي كان في دماغي إن التقييم يبقى بتلت نجوم لا أكثر
الرواية بتبدأ بشاب عندو تلاتين سنة وخارج من السجن، برة السجن بتنتظرو أختو، بنعرف الجريمة اللي ارتكبها، وهو عندو 16 سنة قتل مامتو. وبعد كدة بتبدأ فلاش باك طول الرواية تحكي قصة ثلاثة أجيال، قصة جدة الشاب دة، قصة والدتو وأخواتها، قصة والدو وإخواتو، قصة الشاب نفسو وإخواتو، القصص متداخلة لا يتم سردها مرة واحد، يعني موقف من سنة 1978، موقف من سنة 1991، موقف من سنة 1951، وهكذا

بعد منتصف الرواية عرفت الكاتبة بتعمل ايه، وعرفت عبقرية هذا العمل، وطبعا كان قرار الخمس نجوم واجب، بتحكي قصة ثلاثة أجيال عشان تورينا الأحداث اللي مرت في خلال أربعين عاماً وأدت إن مراهق في السادسة عشر من عمره يقوم بقتل والدته، في نهاية الرواية هتتعاطف مع العائلة كلها، وهتفهم ايه اللي حصل عشان الولد يعمل كدة

رواية مؤثرة، خلتني وأنا بقرأ أبص لبنتي ذات العام والنصف وأقول أنا أموت أحسن من إن أنا أخرب الأسرة الصغيرة اللي أنا أنشأتها، عشان الأخطاء لا تموت، بتعيش مع الجيل اللي بعدينا وبعد بعدينا كمان.
لو قارنا هذا العمل بعمل الكاتبة الأشهر "قواعد العشق الأربعون" هنقول إن قواعد العشق ممتع أكثر، بس هذه الرواية، هتعيش معاك أكتر بكتير وهتأثر فيك أكتر بكتير