ŷ������

عشان تقدر تحكم صح على حاجة معينة لازم الأول تصنّفها صح , فى المكتبة لما استعرت الكتاب دا كان مكانه على رف كتب التاريخ فى وسط كتب تاريخية مؤلفة على النمط البحثى العلمى , لكن الكتاب دا انا شايف انه المفروض يتصنف تبع الروايات , و للدقة أكتر يصنف فى قسم الروايات التاريخية , و لو خلينها على رف الروايات التاريخية و قارنها بالروايات التاريخية التانية هنلاقى وزنه تقيييل جدا لانه فعلا عمل عظيم


الكتاب على نسق رائعة أحمد على باكثير " وا إسلاماه" إلا إن الفرق بينهم إن باكثير كتب روايته العظيمة من جهة جلال الدين و من بعده قطز فى حين إن عكاشة كتب روايته من اتجاه المغول , فلو قرأت الروايتين هتقدر تفهم الصورة الكاملة و تعرف تقدّر الأحداث اللى حصلت فى الفترة دى بقدرها الحقيقي لانها فعلا أحداث تذهل العقل

نبدأ باللغة : لغة الرواية رائعة من أعلى مستويات اللغة اللى قرأتها فى عمل من الأعمال , تراكيب قوية و توظيف ممتاز للألفاظ و صياغة محترمة بعيدة كل البعد عن الركاكة والضعف اللى بنقابله احيانا فى الكتابات التاريخية التانية و يمكن اللغة من اكتر الاسباب اللى خليتني أصنف العمل دا على انه روائى اكتر منه بحثى علمي

الاسلوب : بسيط و بيعتمد كليةً على طريقة السرد المباشر المتتابع , بمعنى إن قصة المغول فيها اكتر من طرف و اكتر من اتجاه , فـ المؤلف كان بيمسك كل اتجاه منهم لحد لما يشرحه بالكامل و بعدها يبدأ فى طرف تانى و هكذا , طبعا الاسلوب دا كويس جدا فى حكاية التاريخ لكن له عيبين , الأول إنك كقارئ على الرغم من انك بتكون مستمتع جدا إلا إنك احيانا بتفقد حتة التزامن فى الأحداث , يعنى جنكيز خان كان بيبعت جيوش لمناطق مختلفة فى وقت واحد , فـ انتا كقارئ ممكن يحصلك التباس انهى مدينة المغول دخلوها مع انهى مدينة فى نفس الوقت , و دا جزء مهم جدا إذا كنت عاوز تربط بين الأحداث عشان تفهم بعض التفصيلات و بعض النتايج المترتبة على حدوث معارك فى نفس الوقت لكن فى مكانين او تلاتة مختلفين ,, النقطة التانية إن السرد المباشر بيعرض صورة التاريخ لكن مش بيحلل الصورة دي , فتيجي تقارن مثلا بين اسلوب عكاشة و اسلوب الصلابي تلاقى انك مستمع جداااا باسلوب عكاشة لكن لو هتدور على الإستفادة الأكبر و الأعمق هتلاقيها فى كتابات الصلابي , و إن كان يشفع للاسلوب دا ان نقطة الملل مش هتحس بيها أبدا على عكس الحال طبعا فى الاسلوب التحليلي اللى بيتطلب انك تكون مركز و مقبل على قراءة البحث بشغف حقيقي و اتجاه دراسي

الموضوع : الكتاب بيتكلم عن ظاهرة المغول اللى أسسها جنكيز خان و طبعا المؤلف مش هو اول واحد يكتب عنها , لكن يميزه شيئ واحد , إن أغلب المؤلفين كتبوا عنها من وجة نظر عربية و اسلامية , لكن عكاشة كتب عنها من وجة نظر مغولية , فـ اثناء قراءتك هتحس ان إنتا عايش بميول المغول و بأهداف المغول و لو انهزموا فى معركة تزعل و لو كسبوا فى معركة تفرح حتى و إن كان انتصارهم دا على مدينة عربية او اسلامية ,, هتقدر من خلال قراءتك تقدّر حجم التضحيات و البطولات اللى العرب و المسلمين بذلوها عشان يصدوا سيل المغول و فى نفس الوقت هتقدّر كم القوة و الإقبال و الشجاعة و الصلابة و البأس فى جنود المغول و قياداتهم و هتعرف إن انتصار المسلمين عليهم فى معركة عين جالوت كان فعلاا و بدون أى مبالغة معجزة من المعجزات لولا كانوا هيجتاحوا العالم كله من شرقه لغربه و كانوا هيقضوا على جزء مهول من الجنس البشرى و التراث الإنسانى و مكنش حد أبدا هيقدر يقف فى وشهم و يوقف التدفق المغولى المهول فى الشرق و الغرب

الكتاب -أو قول الرواية- مبذول فيها مجهود ضخم من البحث و التنقيب و تنقية المعلومات و جمع الروايات ببعض عشان يستخرج منها الرواية الأصح , و بحث كبير جدا عشان يوصل لأصول المغول و نشأتهم و الظروف اللى اتولد فيها جنكيز خان و البيئة اللى عاش فيها و اللى كوّن من خلالها شخصيته و معتقداته و افكاره و ليه كانت طموحاته عالية اوى كدا و ليه كان شخصية فزة و قيادة قليل جدا انك تصادف زيها فى تاريخ العالم

و الكتاب دا فعلا اضافة كويسة للمكتبة العربية مش مجرد تكرار و تقليد لاعمال موجودة بالفعل و مسجلة على صفحات الكتب التانية


تمت