ŷ������

شارع ميجل كانت تجربة لطيفة بالنسبالى عشان عرفتني على دولة مكنتش سمعت عنها قبل كدا "ترينداد" اللى - أما بحثت عنها - لقيت صورها جميلة للغاية كأنها حرفيا حتة من الجنة...



الرواية بتحكي عن شخصيات مختلفة من شارع ميجل على لسان ولد كان عايش هناك...
في شارع ميجل هتشوف سائق عربة القمامة المغرور و الشخص اللى بيتعارك و يضرب أهله دايما و النجار اللى شغال طول اليوم في حاجة محدش يعرفها و خبير المفرقعات النارية و الست اللى عندها ١٢ طفل و الشاعر المغمور و اللى بيحب أمريكا و بينسي بلده و البلطجي و المتعلم و غيره و غيره
الرواية بينتلى ازاى الدول و الأهم الناس شبه بعض خصوصا اما تكون ظروفهم متشابهة .. تختلف الاسامي و الأشكال و تتشابه الشخصيات و الطباع و المواقف..
أكتر من مرة و أنا بقرأ أحس إن الرواية تمشي بردو باسم شارع مصرى عادى مع تغيير بسيط مع إنها عن مكان مختلف تماما...
الرواية مقسمة لفصول كل فصل عن شخصية و ده اللى خلانى أقرأها في وقت طويل لأني بكون مندمجة أكتر في الروايات اللى بتعيشني أكتر في المكان بوصفه و وصف الشخصيات و الأحداث في نفس الوقت و ده اللى محصلش هنا بس كان تجربة مختلفة
الترجمة كانت جميلة للغاية..
و بالمناسبة نسخة الهيئة الصادرة عن سلسلة الجوائز مقدمتها بتحكي الرواية كلها تقريبا فالاحسن تتقرأ في الآخر...
أخيرا دي كانت أول قراءة ل ف س نايبول و إن شاء الله مش الاخيرة في لقاء قريب إن شاء الله مع بيت السيد بيسواس اللى اشترتها مؤخرا من المعرض و لسة مبدأتش فيها