ŷ������

"قفوا، قفوا، وإن كانت أقدامكم في القبور! يجب أن أحيّيكم تحية الفراق. يجب أن أخبركم فردا فردا وجماعة كم أحبكم، وكم فكّرت فيكم منذ ذلك الحين".

هالعمل، إذا بدي أوصفه، فإني رح أستخدم جملة هنري نفسه لما كان بيوصف أعزّاؤه ويلي أثّروا فيه كثير، رح أوصفه بإنو "كتاب حيّ"...

عمل شاسع وحميم ومليء بالألفة، بالرقة، بالحزن، بالحنان، الدفا، والامتنان، والحب المتنوّع ويلي ما بيتحدد بتعاريف. عمل بيسرد فيو هنري تجربته مع الكتب من أيام "الشوارع الكئيبة" يلي قضى طفولته فيها. بيسرد فيو علاقته بأسماء كثيرة سواء كانوا كتّاب، شعراء، أصدقاء طفولة، مراهقة وشباب، أو حتى أشخاص عابرين. الطريقة يلي كان عم يصف فيها هنري -وعم أستخدم اسمه لحاله هون بالرقة الكاملة كطريقة للتعبير والتأكيد على المكانة يلي احتلها هنري بقلبي من أول سطر وحتى آخر واحد، يلي من زمان جدا ما ولجها حدا وأزهرها وأحياها- الأشخاص، الأماكن، الكتب، كانت مليانة، مليانة شو؟ ما تستنوا جواب، اكتشفوا لحالكم. كانت مليانة وبس، هالمفردة بتكفي.

تعرّفت على أسماء كثيرة من كتّاب وشعراء وفنانين، سواء نويت أقرألهم أو مجرّد التعرف عليهم وعلى شو قدموا للعالم كان شي بيجنن، أو حتى مجرد الاستماع لصوت هنري المتحمس والملتهب وهو عم يصفهم كانت متعة لذيذة خالصة حتى لما كان يتعدى ال ٢٠ صفحة وهو عم يصف شي واحد!

أنهيت آخر الصفحات -أو هي أنهتني- بدموع منهمرة، ما عرفت أحدد سبب كثافتها وحرقتها على خدودي، هل كانت لأني عم فارق صديق قضى معي وقت كثير صعب وقدر ينقللي معاني كثير ساعدتني خلال هالفترة؟ هل كانت لأني تعودت عليه وعلى وجوده على طاولتي وفكرة إني أرجعه للمكتبة بتوجّع -حتى وإن كانت بجنبي المكتبة-؟ ولا كانت مشان الكم الهائل من الذكريات والامتنان المشوب بحزن كبير يلي شلع قلبي وتحديدا عند كلمات هنري الأخيرة بهالكتاب يلي اقتبست جزء منها بالبداية؟ الله أعلم...