ŷ������

رواية رائعة استمتعت بقراءتها ... رواية قيامة الحشاشين, صدرت في 2021 ... للكاتب الهادي التيمومي ... و هي من صنف الرواية التاريخية ... تتحدث على طائفة الحشاشين ... و اول حاجة و قبل ما نبداو نحكيو على الرواية, خلينا نتعرفو على شكونهم الحشاشين هاذم ...
هاذم فرقة من فرق الاسماعلية .. شكونهم الاسماعيلية ؟؟ هاذم فرقة من فرق الشيعة .. ماو الشيعة معروفها بكلها فرق و مذاهب, و كل فرقة تدعي الحقيقة و الأحقية في الحكم ...
إذا الشيعة فيها برشا فرق كيما الاثنا عشرية متاع ايران و الا هاذي الاسماعيلية، الاسماعيلية هاذي زادا فيها فرق, منها الفرقة هاذي متاع الحشاشين الي تمردت على الفرقة الأم لاسباب سياسية ..
و كيفاش التقسيم هذا صار ؟؟
مرة فما حاكم فاطمي .. من الدولة الفاطمية الي بدات في المهدية في تونس و بعد تحولت لمصر .. الحاكم الفاطمي هذا مات ... ياخي زوز ولادو تعاركو من أجل شنوا ؟ من أجل الحكم ..
جماعة جاو مع الولد اللول و جماعة جاو مع الثاني, الحشاشين جاو مع الولد الثاني الي اسمو 'نزار المصطفى لدين الله' ... هاكا علاه يقلك هي فرقة نزارية, الحشاشين فرقة نزارية, يعني دعات لولاية الابن نزار هذا ....
فكيما قلنا انقسمو مجموعتين .. مجموعة فازت و مجموعة يقودها راجل اسمو حسن الصباح جبدت روحها و هاجرت الى بلاد فارس الي نقولولها ايران (رغم انو حسن الصباح هذا اصلو من غادي) ...
و حسن الصباح .. هو مؤسس الفرقة و هو رجل عظيم عندهم مُقدس, يقولو الشيخ المؤسس... و يقولولو شيخ الجبل : على خاطر عمل قلعة اسمها 'قلعة ألَموت' في قمة جبل و حصنها و ما خلاو حتى عدو يوصللهم ... شديدة التحصين, موجودة في بلاصة عالية و ما تنجمش الجيوش توصللها الا بصعوبة و هاكا الي يخليها محصنة ...
يقلك شراها حسن الصباح من عند مالكها الاصلي و كون فيها جماعتو ... الي سماهم الفدائيون .. اتباع حسن الصباح هذا : من خلال قوة شخصيته استطاع ان يسيطر عليهم و يستقطب الاتباع ... و كانو مشهورييين بالاغتيالات السياسية, ديما اي مشكلة سياسية طريقتهم في الحرب مع العدو ليست بالجيوش .. بل يبقاو في قلعتهم المحصنة الي ما يوصللها حد و يبعثو عباد يندسو في وسط العدو و يعملو عملية اغتيال لشخصية سياسية كبيرة ...

كان هؤلاء الفدائيون يُلقون الرعب في قلوب الحكّام والأمراء المعادين لهم، وتمكنوا من اغتيال العديد من الشخصيات المهمةفي ذلك الوقت؛ مثل الوزير السلجوقي نظام الملك والخليفة العباسي المسترشد والراشد وملك بيت المقدس كونراد .... و يقلك حاولو حتى يغتالو صلاح الدين الأيوبي.

الحشاشون فعلا كانو يلقون الرعب في قلوب الحكام, و يقلك اسم الححشاشين جا من تسميتهم من قبل الصليبين بالbon ... assassin فما اقوال اخرى تقلك الي التسمية مختلف فيها, فما الي يقلك حشاشين جاية من مؤسسين .. نسبة 'للشيخ المؤسس' الي هو حسن الصباح ... و حشاشين جاية من 'حساسين' نسبة لاسم حسن الصباح شيخ الجبل قائدهم ... و فما يقلم حشاشين جاية من عساسين, الي يباتو الليل لكل يعسو و يحرسو في قلعتهم ...
و فما قول زادا مشهور يقلك حشاشين جاية من الحشيش, على خاطر اسلوبهم في تكوين الفدائيين انو يعطيوهم الحشائش المخدرة باش يتخدرو و يعملو كل ما يطلبه منهم قائدهم
(و بين قوسين و عودة للاغتيالات الارهابية في يومنا, برشا عمليات ارهابيين كبرى, كيف الارهابي يعمل مجزرة و في الاخير يتمكنو رجال المن او الجيش انهم قتلوه, و يهزو جثتو يحلولوها .. يلقاوه مدروغي, على خاطر فما نوع مالدروغ ... يخليه ماعاش يخاف و يتقدم نحو الموت بثبات .. فهاذي أقوال تقلك هاذي كانت طريقة الحشاشين في تجنيد الاتباع ..
تكتبت برشا قصص عليهم,, حتى من قبل الاوروبيين, فما قصة يقلك كيفاش كانو يجندو في الفدائيين ؟ يقلك كانوا عاملين حديقة في قلعتهم قلعة ألموت, كأنها الجنة زارعين فيها و عاملين أنهار اسطناعية و عاملينها كاينها جنة ... , و كيف كانوا يستقطبو فدائي جديد يبدا غبي و هكذا كل الفدائيون للأسف هوم أغبياء و الا ما كان للارهابيين ان يجندوهم و يخدعوهم ..
فيقلك كي يجيبو فدائي يكيفوه الحشيش و الدروغ, و كيف كيما نقولو يشيخ يدخلوه لهالحديقة هاكي .. و يكلمو حسن الصباح كأنه زعيم الحديقة و يقولولو راهي هاذي الجنة, و يلقا حوريات, من الانس بالطبيعة و يعمل جو و بعد كي يخرج يقولو كن فدائيا و ستعود الى تلك الجنة فيذهب و يندس في المجموعة السياسية التي يريدون النيل منها و يقوم بعملية اغتياله ...
رغم انو فما شكون كذب صحة القصة هاذي .... الحاسيلو اول أو من اول فرق الاغتيال في العالم و في العالم الاسلامي .. هاذي الي كنا نحكيو عليها, طائفة الحشاشين, طائفة حسن الصباح.

و تاوا كعودة لروايتنا 'قيامة الحشاشين' ... الرواية الرائعة ... القصة متاعها تقلك الي فما استاذ تاريخ و أثار لقا مخطوطات متاع حسن الصباح قائد الحشاشين في قبر منسي ... فقام برحلة بحث الى اليمن باش يسال شيوخ من بقايا المذهب الاسماعيلي و الي هوما يتسماو الباطنية, والي مازالو موجودين عن المخطوطات الي لقاها و عن فك رموزها و حب يفهمها و يدرسها بحكم تخصصو في التاريخ ..
لكنو تفاجئ كي لقاهم معادين اشد العداء لحسن الصباح و لطائفته, و فيبالهم الي الوثائق هاكي اندثرت مع وثائق اخرى فيها مزامير الصباح و تم اتلافها عبر التاريخ .. و في مذهبهم الجماعة هاذم الي مشالهم بطل الرواية في اليمن, هُم مأورون باتلافها و لو بقتل صاحبها ...
و هذا الي اوقع بطل الروية في ورطة ... خلاتو يهرب من شيوخ الباطنية هاذم و بعد يلاحقوه حتى لبلادو و يدخلو لدارو و يكتفوه و يتفاوض معاهم باش يسلم النسخ الي لقاها .. على خاطرو موش حابب يسلمها بما انو استاذ تاريخ ...
وفجأة باش تنقلب الاحداث, انو الطائفة الاصلانية الي هي تؤمن بالصباح و بالاسماعيلية النزارية هاذي, تسمع بالحكاية و تولي تعمل كل جهدها باش تسترجع الوثائق هاذي متاع شيخهم المقدس حسن الصباح ... و يوليو يشدو الجماعة متاع الطايفة لخرى و يذبحوهم على خاطرهم اتلفو بعضا من مزامير الصباح .. و من هنا تولي الرواية متاع رعب و اكشين ... و من غير ما نزيد نحرقلكم تفاضيلها ... اما متأكد الي هي رواية رائعة أدعوكم أن تقتنوها.