ŷ������

خرافة بالدارجة التونسية ملضومة ببرشة حبّ و برشة مجهود باش كل كلمة في الكتاب تشدّ بلاصتها.
علي اللواتي شاخ و هو يكتب فيها و أنا شخت في مخّي بقرايتها.
تتقرى في عشوية ؛ في ساعة سعيدة.
الخرافة هذه تتحكى للصغير و للكبير و للي يدبي عالحصير.
تنجمو تقراوها بصوت عالي للعزاز عليكم الكلّ.
الكاتب قال في المقدمة إنه عنده مشروع مسرحية غنائية. إن شاء الله ينفذ مشروعه خاطر نستخايل فيها و أنا نقرا. نستخايل في الأوبرات. ذكرتني في مسرحية بالدارجة التونسية تفرجت عليها مرّة في التلفزة عقاب الليل مثّل فيها محمد إدريس و جمال ساسي. مسرحية دون جوان.
نرجعو لخرافة الكامل الغرناطي : حاجة ضامرة و ما أحلاها و ما صاب منها برشة : أمير و أميرة و سلطان و فرسان و قطّاع طرق و طيور تتكلّم.
برافْ، جنّة و فيها بريكاجي!
علي اللواتي الغني عن التعريف ( الخطاب عالباب، ڨمرة سيدي محروس، منامة عروسية) المرة هذا اختار باش تكون الأندلس و غرناطة تحديدا ديكور للأحداث متاع القصة.
القصة يقول إنه لقاها في كتاب آخر مقدمينها كخرافة شعبية متداولة في برّ السبنيور.
فما تتنتظروش شخصيات حقيقية أو أحداث تاريخية بالرغم إنه الإطار الزماني و المكاني يحتم علينا جغرافيا سياسية معينة احترمها الكاتب طبعا ( ملوك الطوائف، الحرب بين المسيحين و المسلمين في اسبانيا الخ الخ).
بالنسبة للأحداث فعندنا قصة حبّ كيما إلي في الكتب.
متاع الحب من أول نظرة و الي يشوف محبوبه يطيح ما في عينه بلْة.. حبّ فخّار بكري.
ماعادش منه توة.
حبّ و لوعة و " هو و الا لا و الا نشرب كأس دواء".