ŷ������

مسار الأزرق الحزين

من ترشيح شخص كان موجود في دار الكرمة في معرض الكتاب ٢٠٢٣ بعد ما سألته عن مجلة أمكنة بأجزاءها وفين ألاقيها بالظبط، لقيته بيقولي الكتاب دا فعلاً جميل جداً، علاء خالد كتبه بسبب تجربته في مستشفى بعد جراحة عرّضته للخطر، إوعي تمشي من غير ما تاخديه..
وفعلاً أخدته..علشان أنا واثقة في أسلوب علاء خالد بعد تجربة واحدة معاه في ( أمكنة - الجزء الثاني )
وعلشان الشخص دا كان مقنع وأنا اشتريت بصراحة 😂
وثالث سبب علشان الغلاف، بسيط جداً ومبهر جداً بالنسبالي..

فكرة إنك تكتب كتاب بعد تجربة مريرة مع الموت دي فكرة قاسية جداً، مؤلمة جداً ومخيفة جداً..حتى بعد ما خلّصت الكتاب مش قادرة أستوعب إزاي شخص، بني آدم، من لحم ودم، استحمل عذاب زي دا؟
وإزاي غيره كتير يومياً بل كل ساعة ودقيقة فيه آلاف غيره أو ملايين في كل مكان بيتألموا نفس الألم وأكتر..
فكرة الألم نفسها مرعبة..
الواحد لما بيتخدش بس من سكينة جرح على قد بساطته بنكره ألمه جداً..فـ تجربة مهولة مليئة بالآلام زي اللي اختبرها الكاتب حقيقي وبعد سنين مرّت عليها أتمنى يكون قدر يتخطاها نفسياً وجسدياً..

يمكن تجربته الصعبة خلّت الواحد يصدّق كل كلمة موجودة في الكتاب، وكل إحساس وكل ألم و كل نظرة وشعور وتخيُّل إتكلم عنه.. بالنسبالي إن مستحيل حد خرج بمعجزة من تجربة قاسية زي دي إنه يوصف غير اللي كان حاسس بيه فعلاً..
ودا كافي يخليني أقرأ أكتر من ١٨٠ صفحة بتتكلم عن الموت والحياة الثانية والخوف والخيالات والمستشفيات بدون ما أحسّ إن عدد الصفحات دي كتير..
أنا شايفة إن من حقه يوصف على قد ما هو عايز
الشخص دا اختبر تجربة فعلاً مش سهلة ويمكن أي حد فينا مكنش يستحملها.. هنقيّده ليه إنه يكتب بحرية ويطلّع كل مشاعره على الورق.. دي حتى حاجة قليلة..

ياريت كل اللي بيمرّوا بشيئ مُشابه يقدروا يتكلموا عنه كدا
يمكن دا يخفف من حِملهم كتير..

إسم الكتاب مميز، يشدّ جداً لو حد حتى مش عارف قصة الكتاب ولا الكاتب فالإسم كفيل يجذبه إنه يقرؤه..
وكمان السبب وراء تسميته كان غير متوقع بالنسبالي ومؤلم بردو..

الكتاب جميل وسلس، أسلوب علاء خالد -حتى في أحلك حالات كتاباته- ممتع جداً جداً ودا اللي مقدرتش أتردد قدامه وأنا باخد الكتاب..
كنت بقرأ وحاسه إني بجري وسط السطور من غير ما أحس..
الإقتباسات الموجودة جميلة معبرة وقوية وحقيقي عجبتني جداً..

حبيت أوي كلامه عن زوجته وعلاقتهم المتفرّدة الواضحة من كلماته، وقوفها جنبه لحظة بلحظة في أزمته الشديدة دي وحبهم الكبير لبعض..وصفه لعلاقتهم بجد كان عذب جداً..


الكتاب طبعاً له تأثير ثقيل على القلب بسبب صعوبة اللي عاشه وإنه قدر يوصلهولي فعلاً..

وفي النهاية قفلت الكتاب وأنا بحمد ربنا على نعمة الصحة وحدها والله..هي لوحدها كافية جداً جداً..
ربنا يحفظ الجميع، ويعافي مرضاه ويشفيهم جميعاً اللهم آمين..