ŷ������

احك يا أبي_ احك.
لا توجد أبداً برتقالتين متشابهتين في هذا العالم !
ثلاث ساعات استغرقتني تلك الرواية من الوقت لإتمام قرأئتها، العمل المبدع والذي قلما تقرأ شيئاً مثله، لأول مرة في حياتي أبكي أثناء القراءة، وأنا كعادتي مش بتأثر بسرعة ومش عاطفي خالص، لكن يمكن لإن الأحداث لمستني وحسيت بيها كأني البطل تماماً، ويمكن لتشابه بين شخصية جورج البطل وبيني.
حقاً هي رواية عجبية بكل المقاييس، مزج فيها الكاتب ما بين السرد المحكم، والروي المباشر، ومابين التطويل في الحوار ومط الحديث، حوارات طويلة ما بين الأبطال، تبادل الروي ما بينهم، تمسك فيها البطل جورج بزمام الأمور وكان هو الراوي والمفسر والمحلل للكلام، فكرني بأسلوب ساراماجو في السرد والتدخل، إلا إنه هنا البطل كان من داخل الرواية على عكس ساراماجو، أسلوب الترجمة كان مشابه لأعمال ساراماجو المترجمة من حيث كثرة الوقف واسنخدام الفاصلة والنقطة دوناً عن باقي العلامات، واللي بتسبب أحياناً تشتت في حالة عدم التركيز وفقد الإنتباه.
هتكلم عن القصة أولاً فكرة الرواية مش جديدة، ومش عبقرية من حيث القصة نفسها، ولكن اللي جذب إنتباهي هو شكلها الفريد والصياغة الفلسفية للأفكار، وغرازة معلومات الكاتب والموضوع العام للرواية فكرة الوجود والسبب من وراء وجودنا، وهل إحنا لينا هدف في الحياة ولا خلقنا اعتباطاً
أسلوب جاردر جميل، مو مشابه لدان براون من حيث كثرة الألغاز، والإثارة وكده، إلا إنه أقل منه من الناحية الأدبية، ودان براون أمتع كتير، عجبتني جداً غزارة معلومات الكاتب، وكونه قدر يصيغ أفكار تتسم بالصعوبة والقوة بطريقة أدبية بسيطة، من الروايات الفلسفية اللي بتشقلب فكرك تماماً.
الحوارات ما بين الشخصيات وإن كانت مفتعلة أحياناً، إلا إنه ما بينها كلمات لا تخلو من الحكمة ونصائح عظيمة الأثر، عن الرواية مفسها ليا تعليق بسيط على جاردر، جاردر فيلسوف ومفكر كبير وعالم أصيل وبارع ومبدع في مجاله، لكن كروائي فهو على درجة أقل منه كفيلسوف، الرواية أحداثها بطيئة جداً مملة في بناءها، جافة في دراماتيكيتها، ما عدا الجزء الأخير منها واللي أبكاني حقيقة، الرواية فيها تطويل فظيع، وأحداث كنا في غنى عنها وشايفها ملهاش أي دور في الرواية، وحسيت إنها حشو على الفارغ، مط ورغي ولت وعجن مفيش منه بد، كان ممكن يخصتر الجزء بتاع ميزات كل شخصية أو حتى يلغيه، وده من العيوب اللي خلتني أفكر أترك الرواية من كتر الملل، وده شئ متكرر برضه وشفته في عالم صوفي، فهي جاءت ممتعة مغلفة بملل شديد، وأحداث وتفاصيل كتير ملهاش لازمة، وده يرجع لنمطية الكاتب واللي ملحوظة في كل أعماله واللي ممكن تثني أي حد إنه يكمل الكتاب بسببه، الرواية عامة كويسة جداً وممكن لو تمعنت في ما بين السطور وحسيت كل فكرة في الرواية وفكرت في مدى واقعيتها ممكن تغير فكرتك ونظرتك للكون ولنفسك، وده كان الغالب في نهاية الرواية اللي كانت مليئة بالنصائح والمقولات الحكيمة، بالنسبة للأفكار الفلسفية اللي في الرواية فأنا عندي تغليق بسيط، ويمكن ده الجزء الأكبر اللي هيتعرض للنقد، كون الأب كان كافر بالآخرة وبالبعث بعد الموت، وكونه بينتقد أفكار دينية معينة، واللي كانت غامضة لشكل كبير، فهو أحياناً يقر بنظرية الخلق وأحياناً بنظرية التطور لدارةيت، ومابين نظرته التشاؤمية للوجود البشري، وما بين التفاؤل عند الإبن، إلا إنه كان محايد بشكل كبير جداً ومنصف في طرحه للأفكار دي، فهو ما أجبركش على فكرة معينة وأصر على إقناعك بيها، هو عمل طرح للأفكار كافة و سمح لكل قارئ يتعاطف مع الفكرة المتفقة مع أيدولوجيته الدينية والفكرية، وده شئ يحسب لجاردر أكيد، وهو كان ملاحظ برضه في روايته الشهيرة، عالم صوفي، نفس الجمال والحياد في العرض.
نظرة عامة للرواية : الرواية في أولها كانت جيدة وإن أتسمت بالبطئ، والجز التاني كان بطئ جداً وممل وتفاصيله مقرفة في عرضه للشخصيات وكترتها كانت سبب في إضفاء كم كبير من الملل، الجزء التالت كان مشوق وجيد جداً، إلا إن الجزء الأخير من الرواية هو الأفضل على الإطلاق وكان نفسي ما يخلصش بالسرعة دي، الولد وأبوه ورسالته له وزوج أمه كلها شخصيات جه على لسانها كلمات جميلة جداً وعجبتني بشدة، ده كان سبب إن الرواية شكلها اتغير من حال لحال، أحياناً مملة وأحياناً ممتعة
التقييم: خمس نجوم أكيد، وإن كنت هبقى مجامل شوية بس ده يرجع إن الرواية فريدة، وعجبني جداً المزج ما بين الفكر والفلسفة والأدب، ولإنها هتسيب فيك أثر أكيد وقوي بعد قرائتها، وما أعتقدش إنك بعد قرائتها هتخرج ممن غير إستفادة، وإحتمال تغير نظرتك للوجود ونظرتك للحياة، وهتعرفك برضه قيمتك وهدف الإله من خلقك والسبب لوجودك في الكون ده
تجربة مثيرة جداً واستمتعت بالرواية جداً وأعتقد مش هتكون آخر قراءة لجاردر، فهو مع ضعفه روائاً إلا إنه قوي جداً من ناحية الفكر والفلسفة، وكتاباته تستحق العناء
الترجمة كانت متوسطة، لا بأس بها، أحياناً كانت ضعيفة وأحياناً جيدة بس الشكل العام لها كان كويس.
أشكر هبة شكراً جزيلاً لترشيحها الرواية دي وكونها حمستني لقراءتها.