ŷ������

"Knowledge is power"

المعرفة قوة ..من الاقوال اللى بحبها و بحسها حقيقية للغاية..لكن ربما هى ليست قوة على قد ما هى نقمة للناس اللى شايفين اللعبة و شايفين خيوطها المتشابكة لكن ميقدروش يشاركوا فيها..

اظن ده مكنش هدف صنع الله من الرواية, لكن ده كان اكتر شىء لفتنى فى الرواية القصيرة جدا -مقارنة باعمال صنع الله-

كالعادة صنع الله بيمارس هوايته فى توضيح صورة شبكة المصالح اللى احنا عايشين فيها, حاجة اشبه بما فعله فى روايته شرف ..
شبكة معقدة للغاية وتحس قد ايه الشعوب بيتلعب بيها و قد ايه احنا منعرفش حاجة من اللى بتحصل حوالينا و علاقة الحاجات دى ببعض اللى تبدو احداث منفصلة و غير مترابطة لكنها ليها مدلول لا يعيه غير الباحث فى التفاصيل, زى بطل الرواية..

الجزء اللى كان بيبحث فيه البطل عن كل ما يتعلق ب"الدكتور" هو اكتر حاجة عجبتنى فى الرواية و كان نفسى صنع الله يبنى عليها اكتر, اكتر حاجة عجبتنى هو توضيح الاسلوب اللى اتبعه فى البحث و طريقة حصوله على المعلومات, اللى هى غالبا كانت من الجرايد, الجرايد اللى كلنا بتقراه لكن محدش بينتبه لما وراء الخبر او علاقة الخبر ده بسلسلة اخبار تانية سابقة, محدش بيركز و عشان كده محدش بياخد باله غير اللى يقرر انه يبحث و يدور ..

فكرة ان كل شىء موجود و معلن لكن احنا اللى مش واخدين بالنا دى فكرة بتبهرنى بصراحة, و وضحت اكتر كمان فى الفترة ما بعد الثورة حيث كمية اخبار و اشاعات بتظهر و تختفى و تبدو عبثية و غير مقصودة تماما لكن بالنظر اليها تكتشف ان الموضوع اكبر من كده بكتير, ده مع الاخبار و الاشاعات, ما بالك بصفحات الاجتماعيات و الوفيات اللى تقدر تعرف منها بلاوى عن الشبكة..

كل حاجة موجودة, كلها, بس محتاجة حد مركّز يشوف ما وراء الخبر وعلاقته بأخبار اخرى و اخبار سابقة..حاجة 95% من الشعوب بتفتقدها..

والقضية كمان هى ان لما حد يدرب مخه على الانتباه ومحاولة ربط حدث بحاجات تانية, يبتدى يشوف فى كل حاجة سلسلة من الحاجات و يحاول يدور على العلاقة ما بينها, زى الناس اللى نظرية المؤامرة واكلة دماغهم, وده الى حصل لبطلنا لما شاف اتوبيس "كارتر" مثلا, شىء مهلك اساسا و بياكل البنى ادم, و عشان كده كان قرار اللجنة و كانت النهاية القوية و المنطقية للرواية..

تقديم الكوكاكولا اللى عمله البطل للجنة كان مثير للغاية ومهم لنفس الاسباب المذكورة سابقا..

ليه نجمتين؟ رغم اللى طلعت بيه من الرواية لكن كانت مملة الى حد ما و فيها حشو اتعودت عليه فى روايات صنع الله, المشكلة ربما هو ان الرواية دى كانت قصيرة فمكنش مبرر الحشو ده زى فى رواياته الطويلة , او ربما I had 2 much Son3allah..
تلات روايات ورا بعض ربما اثر سلبيا على تقييمى بما انى شخصية ملولة بطبعى..

ناخد بريك من صنع الله و نبقى نرجعله مرة اخرى.. لكن الرواية لازم تتقرى طبعا...