ŷ������

أشهد أنا، محمد مجدي مختار، إني قريت رواية الطلياني اللي فازت بجائزة البوكر، وتم اعتبارها أفضل رواية عربية في 2015 من وجهة نظر اللجنة المحكمة، إني حاولت وبذلت قصاري جهدي، عشان أعرف ايه المميز في الرواية دي، أو ايه الإسقاط اللي ممكن يكون سر اختيارها، أو ايه السر الذي يكمن بين السطور، ولكنني فشلت تماما

أولاً، وجدتها رواية عادية جدا وتقليدية للغاية، القصص دي اتعملت عشرات إن لم يكن مئات المرات وحفظناها عن ظهر قلب، كأنك بتقول أنا هعمل قصة جديدة لانج، قصة ولد وبنت بيحبه بعض، وأهلهم مش موافقين على الجواز، فلجنة أشهر جايزة في الوطن العربي تنبهر بالقصة وتديك جايزة أفضل رواية لهذا العام

ثانياً في خطأ ملحوظ تماما في السرد، الراوي هو صديق مشترك للبطل والبطلة، وسبحان الله عارف أدق تفاصيلهم بداية من الخواطر التي تنتابهم، إلى ما يحدث بينهم في غرفة النوم بالتفصيل، كنت منتظر في آخر الرواية إن الشخصية دي تطلع شبح أو لديها قدرات ميتافيزيقيا

ثالثاً شخصية البطلة اللي هيا زينة، حصلها أكتر من تحول مفاجىء في خلال الرواية، تحول من زوجة مستهترة لا تهتم بزوجها ولا تفكر فيه، إلى زوجة ترتدي له لانجيري وكعب عالي وتضع ماكياج وتبتاع له الهدايا، وكل دة بعد ما اكتشفت خيانته لها، كأنها بتكافئه بالخيانة بدل ما تدايق، تحول آخر عندما لم تستطع الحصول على منصب تدريس في الجامعة، بس همتنع عن ذكر التحول منعا لحرق الأحداث

رابعاً الرواية بتحكي جزء من تاريخ تونس اللي هو ما قبل إنقلاب زين العابدين على بورقيبة وأحداث الإنقلاب نفسه، الموضوع دة كلنا عارفينه، ايه الجديد، متكلمتش على فترة مجهولة من التاريخ تستدعي إننا ننبهر بحكايتك ليها

خامسا، هي دي الرواية اللي هتترجم للغرب عشان يقرؤوا رواياتنا العربية؟ ليهم حق ميبصوش لأي حاجة بنعملها طالما بنقدملهم وعاء مليء بالتقليدية

الرواية بتحكي قصة حياة شاب يساري ثوري، بيحب واحدة مناضلة وثورية زيه في الجامعة، وبيتجوزها

في الرواية هنشوف المثلث الذي يتكون أضلاعه من اليساريين الثوريين، والجماعات الإسلامية، وأمن الجامعة الذي استخدم الإسلاميين كي يضرب اليسار، وكل دة من خلال قصة حياة الطلياني الشخصية الرئيسية في الرواية، عدو بقى معايا كام روائي كتب عن طالب يساري حب واحدة يسارية واشتركوا في النضال

في بداية الرواية الكاتب حاول يعمل محاولة فاشلة للتشويق، فبدأت الرواية إن الطلياني وهو بيحضر دفنة والده، بيضرب إمام الجامع، وطول الرواية الراوي بيحكلنا قصة حياة الطلياني عشان يقولنا ليه ضرب إمام الجامع في اليوم دة، مش هقول السبب عشان لو حد حب يقرا الرواية، بس يكفي الإشارة إلى أنه تم هرسه في أكتر من مليون رواية وفيلم

تقييمي ليها نجمتين، على حسب الجودريدز معناها
it's okay
لكن تكون أفضل رواية عربية لهذا العام، أكيد لا