ŷ������

مين فينا جاي مرساها مين رايح
لحظة ميلاد الفرح كان فيه حبيب رايح
..

تقريبا مفيش حد مشافش مسلسل حديث الصباح والمساء و اللى الحقيقة لولاه مكنتش قدرت أحب و لا حتي أفهم الرواية..
بيرسم محفوظ هنا شجرة عائلة ضخمة بتبدأ بيزيد المصري و فرجة و عطا المراكيبي و الشيخ القليوبي و الطرابيشي و هدى هانم و بتزاوج أولادهم بتكبر العيلة جدا و بنشوف أحفاد الأحفاد و اختلاف مشاكلهم و طريقة تفكيرهم..
الجميل هنا هو تنوع و ثراء الشخصيات و اللى بيخليك اكيد تلاقي شخصيات كتير بتفكرك بحد تعرفه او حتي بتفكرك بنفسك..

..
ونشوف ملامح الزمن متعادة في المواليد..
واحنا البشر كلنا أعمار ورق بيطير..
..
في رواية واحدة بس هتلاقي حكايات و شخصيات كتير جدا
حكاية حب رايقة و مرسومة بشكل جميل بين عطا المراكيبي معسول اللسان و الرقيقة هدي هانم و حكاية حب اصيلة و قوية بين الشيخ معاوية و جليلة و بين عمرو و راضية و حكايات رقيقة لطيفة زى سميرة و حسين و احمد و فوزية

حبيت شخصية عزيز و جمال و بساطة شخصية عزيز و مشاعره الحقيقية دايما.. و علاقة دنانير بأبوها مع اعتراضي على طريقتها ساعات.. و العلاقة القمر بين جليلة و نعمة و الصحوبية اللى بتدوم لآخر العمر



..
دايرة تدور بالبشر ويّا الزمان بتفوت.. دمعة على اللى مضى ودمعة فرح للجاى..
يا حى طول مانت حى مسيره ييجى الدور.. دى حكاية متكرّرة من يوم ولادة الضى
..
وسط الحكايات و المواقف تظل جليلة صاحبة المواقف الأقرب لقلبي سواء كانت في الضحك أو العياط.. مفيش مرة شفت مشهد رجوع معاوية و استقبال جليلة ليه أو حزنها على صديقها عمرها نعمة إلا و عيطت
"عدمت بعدك الحبايب يا نعمة..يا عشرتي الحلوة يا نعمة"
أو زغرطتها عشان فرح بنتها بعد موت جوزها بوقت قليل.. ده غير مواقفها مع بليغ و مع عمرو.. صعب جدا تقرأ عن شخصية جليلة من غير ما تبقي شايفها عبلة كامل في كل تصرفاتها..

..
يا اللى انت عايش حياة بص لها تلقاها..
سبحة هنا وتنفرط بالعمر مانشوفهاش
..
و وسط كل الشخصيات بتيجي الشخصية الأقرب لقلبي و اللى بحب رسمها و تفاصيلها.. الحائر دائما "داوود يزيد المصرى"
داوود اتولد في مصر و اتعلم في فرنسا و رجع مصر تاني.. لا هو مصرى و لا هو فرنساوى.. لا عارف يبقي شهم و ابن بلد زى ابوه اخوه و لا عارف يبقي ارستقراطي و غني زي ما المفروض يكون بعد ما تجوز سنية الوراق.. عايز مجد و اسم و ونس و عيلة و زوجة جميلة رقيقة بتحبه .. خلاص كدا كله تمام يا داوود؟
بيرجع داوود تاني.. تايه.. مش عارف هو عايز ايه و لا عارف هو مين.. بيقرر يتمرد.. يسيب كل ده و يروح لجوهر و يتجوزها و يظهر بيها في المناسبات.. كدا أنا حققت اللى أنا عايزه...خلاص كدا؟؟
الكثير من الحيرة تاني.. و التوهة و اللخبطة.. أنا كدا راضي عن حياتي؟.. أنا فعلا كنت عايز جوهر أصلا.. مش عطا مات.. هدي هانم جوهرة.. أنا عارف دلوقتي أنا عايز ايه.. تتجوزيني يا هدي هانم؟
أنا بحب شخصيته جدا.. و بيصعب عليا خصوصا أما كبر مع إني ضد كتير من اللى عمله.. بس تظل شخصية داوود بأداء مرعب من خالد النبوي هي بالنسبالى رمز للتردد و التوهة اللى أتمني إن عمرى ما أبقي فيها..

في الآخر عمرى ما كنت هحب الرواية كدا يمكن و لا أقرأها حتي من غير المسلسل.. المسلسل ده من الأعمال النادرة اللى صعب تلاقي فيها غلطة.. كاست رهيب.. قصة لمحفوظ.. تتر جميل بكلمات بتفضل معلقة معاك دايما.. و أحداث و شخصيات كتيرة ميتزهقش منها..
هنا الرواية بتنتهي بيزيد اللى بيبدأ بيه المسلسل و معظم الشخصيات اللى اتحكي عنها كانوا في عدد صفحات قليل جدا و من غير التفاصيل و الملامح الجميلة اللى عملها محسن زايد في مسلسلى المفضل "حديث الصباح و المساء"
..
ولا شىء يعطّر حياتنا يمد في مداها..
غير سيرة عاشت هنا أكتر صاحبها ما عاش 💖