ŷ������

اكتر حاجة بحبها في كتب السيرة هي الجانب الانساني اللي بيظهر للشخصيات.
نصر حامد ابوزيد اكيد كان مثار جدل ولغط كبير، لكن في الكتاب دا، شفت الجانب الانساني منه، شفت كفاحه ورحلته من فني لاسلكي بقسم شرطة، لاستاذ اللغة العربية والدراسات الاسلامية بجامعة لايدن بهولندا (وقبلها جامعة القاهرة) ، شفت فيه انسان مكافح، بدأ من بيئة بسيطة وموارد محدودة وظروف صعبة، ووصل لما وصل له، شفت فيه تمسك بمبادئ وقناعات هو مؤمن بيها سببتله مشاكل وصلت لاهدار دمه والتفريق بين زوجه! شجاعة وثبات علي المبادئ مش موجود جزء من المليون منها عند الكثير ممن اتهموه في دينه، شفت تجربته الحياتية اللي مقدرش غير اني انحني احتراما ليها (وكذلك كل تجربة اصيلة حقيقية). شفت فيه حسه بالمسؤلية تجاه اهله واخوته، وعدله وانصافه في تجربة زواجه الاولي (علي حسب كلامه طبعا) وشفت كرم ربنا ليه انه يبعتله حد زي زوجته ابتهال اللي تكون سند وعون ليه في الفترة العصيبة.

فيه افكار كتير وكلام كتير مفهمتوش او مفهمتش هو يقصد ايه او حجم الكلام او وراه ايه، واتمني اني افهم في يوم، لكن عموما يكفي اني عرفت قد ايه انا ناقصني حاجات كتير اتعلمها، ويكفي انه عرفني ان لسه في قضايا وافكار كتير محتاج اسمو ليها. يمكن دا السبب اللي خلاني اقيمه باربعة نجوم.

الله يرحمه.. ويرحمنا.