ŷ������

"أنا كنت واحداني ..والدنيا واخداني
عايز ونيس تاني ..يقاسمني في الأحلام
غريب وأنا في بلدي..جبتك تكون سندي
انصفني يا ولدي..واصبر على الأيام "

ونوارة نجم نصفت والدها في هذا الكتاب الرائع😍

الكتاب ببساطة هو فضفضة ..فضفضة من بنت كانت بتحب أبوها..بتحبه بعيوبه قبل مميزاته...بتتكلم عن حياتها وهي طفلة، مراهقةو شابة عاشت في ظل شخص استثنائي على المستويين الإبداعي والإنساني ..

"أحمد فؤاد نجم مكس، كل حاجة والعكس.."

الكتاب دافي أوي ..نوارة بتحكي عن والدها بتلقائية شديدة وبمنتهي البساطة و جاءت كل حكايتها صادقة جداً و فعلاً حتحس إنها بتتكلم من قلبها و مش بتذوق الكلام...

"مصر يا امه يا بهية
يا ام طرحة وجلابية
الزمن شاب وانتِ شابة
هو رايح وانتِ جاية
جاية فوق الصعب ماشية
فات عليكِ ليل ومِية
واحتمالك هو هو
وابتسامتك هي هي
تضحكي للصبح يصبح
بعد ليلة ومغربية "

الكتاب ثري جداً رغم بساطته..حتشوف مصر بأحداث كتير حصلت فيها بس بعيون نجم وكلام نوارة...
حيفكرك بزمن المدونات و ثورة ٢٥ يناير و حكم الأخوان...

"واسمعي يا بلدنا خلاصة القول
وباقولك أهو وأنا أد القول
مش ممكن كده حيحول الحول
على كده والناس يفضلوا ساكتين
خليكوا شاهدين..خليكوا فاكرين"

في هذا الكتاب حتعرف نوارة أكتر وأكيد حتحبها و حتتعرف علي جوانب كتير من شخصية أحمد فؤاد نجم ذلك الشاعر الفذ و الأب المثير للجدل والزوج الغير تقليدي...
تجربة إنسانية تستحق أن تُروى حتى إن بدت عادية وكتاب يستحق أن يُقرأ حتي لو إنت مش من هواة أحمد فؤاد نجم عشان متأكدة حتخلص الكتاب و حتكون بتحبه و جداً كمان وحتدور علي كل اللي كتبه عشان تقرأه..

شكراً نوارة و يا زين ما خلفت يا عم نجم❤️

"مد الخطوة وامشي، تلجى الصعب فات..."